ಆ ಮುಗುದೆ

ಆ ಮುಗುದೆ

ಅರಳುತಿಹ ಕೆಂದಾವರೆಯ ಎಳೆಯ
ದಳಗಳ ಮುತ್ತಿಕ್ಕಿದ ಶುಭ್ರ ಸ್ಪಟಿಕ
ಬಿರಿದ ಗುಲಾಬಿಯ ಸೋಕಿದ ಮುತ್ತಿನ ಹನಿ
ಮಲ್ಲಿಗೆಯ ಸೊಂಪು ಸಿರಿ ಸಂಪಿಗೆಯ ಕಂಪು
                      -- ಆ ಮುಗುದೆ॥

ಉಲ್ಲಸಿತ ಪಲ್ಲವಿಸುತಿಹ ಸೂರ್ಯರಶ್ಮಿ
ಕುರುಳನರಳಿಸುವ ಮಂದಾನಿಲ
ಹಸಿರ ಹೊದ್ದ ಮುಂಜಾವ ಮಂಜು
ಏಕ ನಿನಾದದೊಳು ತಾ ಮೆರೆವ ನಿರ್ಮಲ ಜಲಧಿ
                        -- ಆ ಮುಗುದೆ॥

ಹೊತ್ತು ಕಂತುವ ಹೊತ್ತ ಬಾನ ವರ್ಣವು ಮೊಗದಿ
ಗೂಡ ಸೇರುತಿಹ ಬಾನಾಡಿಗಳ ನಡುವೆ ಬೆದರಿದ ಹರಿಣಿ
ಚಕ್ರಗಳ ಸ್ವಾಧೀನಗೊಳಿಸಿದ ಸುಷುಮ್ನಾವಸ್ಥೆಯ ಯೋಗಿ
ನಿಶೆಯ ನಶೆಗೆ ಜಾರುತಿಹ ಬೆಳದಿಂಗಳ ಬಾಲೆ
                         -- ಆ ಮುಗುದೆ॥